ທ່ານ ຮອງນາຍົກລັດຖະມົນຕີ ສືບຕໍ່ຊຸກຍູ້ການພັດທະນາ

 

ໃນຕອນບ່າຍຂອງວັນທີ 14 ມິຖຸນານີ້, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຕິດຕາມ, ກວດກາເບິ່ງພື້ນ ຖານເສດຖະກິດຂອງແຂວງບໍ່ແກ້ວ ເຊິ່ງຮ່ວມເຄື່ອນໄຫວ ມີທ່ານ ບົວຄົງ ນາມມະວົງ ເຈົ້າແຂວງໆບໍ່ແກ້ວ ພ້ອມຄະນະ.
ກ່ອນອື່ນ, ທ່ານຮອງນາຍົກລັດຖະມົນຕີ ໄດ້ໄປເບິ່ງດ່ານສາກົນຂົວມິດຕະພາບ 4 ຫ້ວຍຊາຍ-ຊຽງຂອງ ເພື່ອຕິດຕາມຊຸກຍູ້ການປະຕິບັດໜ້າທີ່ວຽກງານ ຂອງພະ ນັກງານປະຈຳຢູ່ດ່ານດັ່ງກ່າວ ໂດຍໄດ້ຮັບຟັງການລາຍຫຍໍ້ຈາກທ່ານ ພັທ ນໍຄຳ ດາລາວົງ ຫົວໜ້າຄະນະຄຸ້ມຄອງດ່ານສາກົນຂົວມິດຕະ ພາບ 4 ເຊິ່ງພາຍຫຼັງເປີດດ່ານ ໃນກາງເດືອນພຶດສະພາ 2022 ເປັນຕົ້ນມາ ເຫັນວ່າ ມີຄົນເຂົ້າ-ອອກດ່ານ ສະເລ່ຍ 130 ຄົນ/ມື້, ຕ່າງປະເທດ 80 ຄົນ/ມື້, ພາຫະນະເຂົ້າ-ອອກ 100 ກວ່າຄັນ/ມື້, ການເຂົ້າ-ອອກດ່ານ ແມ່ນປະ ຕິບັດຕາມລະບົບສາກົນ ໂດຍມີການກັ່ນກອງ, ກວດອຸນຫະພູມຮ່າງກາຍ ແລະ ອື່ນໆ ເພື່ອປ້ອງກັນການຕິດ ແລະ ແຜ່ເຊື້ອຂອງພະຍາດໂຄວິດ-19. ຈາກນັ້ນ, ທ່ານຮອງນາຍົກລັດຖະມົນຕີ ແລະ ຄະ ນະໄດ້ສືບຕໍ່ເບິ່ງຟາມລ້ຽງງົວຂອງບໍລິສັດ ດວງຈະເລີນອຸດສາຫະ ກຳ-ກະ ສິກຳອິນ ຊີ ຂາເຂົ້າ-ຂາອອກ ຈຳກັດຜູ້ດຽວ ເຊິ່ງ ຟາມດັ່ງກ່າວ ມີງົວແມ່ພັນຊີ້ນວາກິວແອງກັດ ຈາກແຂວງຊຽງຂວາງຈຳນວນ 151 ແມ່, ມີເນື້ອທີ່ສຳປະທານ 150 ເຮັກຕາ, ໃນນັ້ນ ໄດ້ປູກຫຍ້າແລ້ວ 73 ເຮັກຕາ ມີຫຍ້າເນເປຍ 55 ເຮັກຕາ, ຫຍ້າຣູຊີ 17 ເຮັກຕາ ແລະ ຫຍ້າຫວານ 0,5 ເຮັກຕາ. ສໍາຫຼັບການລ້ຽງ ແລະ ບົວລະບັດຮັກສາງົວ ແມ່ນປະຕິບັດຕາມເຕັກນິກວິຊາການ ໂດຍສະເພາະ ການສັກຢາບຳລຸງແມ່ພັນທ້ອງຫວ່າງ, ສັກຢາຂ້າແມ່ກາຝາກ ແລະ ວັກຊີນ ປ້ອງກັນພະຍາດເຕົ້າໂຮມເລືອດ- ປາກເປືອຍລົງເລັບ; ນອກຈາກນັ້ນ ຍັງໄດ້ໄປຢ້ຽມຢາມໂຄງການກໍ່ສ້າງສວນສາທາ ລະນະໜອງຖານ ໂດຍພັດທະນາເປັນໂຊນຕ່າງໆ ເປັນຕົ້ນ ໂຊນພັກຜ່ອນ, ໂຊນກິດຈະກໍາກິລາ, ໂຊນກິດຈະກຳສົ່ງເສີມ ການປູກ-ການລ້ຽງ. ໃນຕອນທ້າຍ ໄດ້ໄປຢ້ຽມ ຢາມສະຖານທີ່ລ້ຽງກຸ້ງ-ລ້ຽງປາທັນສະໄໝ ຂອງບໍລິສັດບໍ່ແກ້ວນາຍຸງ ຈຳກັດຜູ້ດຽວ ແລະ ສູນການຄ້າສາກົນ ຕື່ມອີກ.

ພາບ-ຂ່າວ: ກົມປະຊາສຳພັນ, ຫສນຍ.

ສົ່ງຂໍ້ຄວາມ

ທີ່ຕັ້ງຫ້ອງການ